Me një shënim të publikuar në faqen e vet zyrtare në internet, Empoli njoftoi se kishte blerë Etrit Berishën nga Torino, i cili po transferohet në Toskanë në mënyrë të përhershme: “Klubi i Futbollit Empoli njofton se ka arritur një marrëveshje me klubin e futbollit Torino për blerjen përfundimisht të shërbimeve sportive të futbollistit Etrit Berisha.
Etrit Berisha është portier me kombësi shqiptare, i lindur në Prishtinë më 10 mars 1989. Ai u rrit në sektorin e të rinjve të KF 2 Korriku në Kosovë, më vonë te Kalmar në Suedi, me të cilin debutoi në “Allsvenskan” në vitin 2010. Etriti gjeti hapësirë aktivizimi rregullisht, duke luajtur 61 ndeshje në dy sezonet në vijim.
Në sezonin 2012-2013, Berisha shënoi tre gola, të gjithë nga penalltitë. Më pas, Lazio e mori portierin shqiptar. Debutimi i tij në Serie A erdhi më 6 janar 2014, në fitoren 1-0 ndaj Interit. Sezonin e tij të parë në Itali e përfundoi me 17 paraqitje në Serie A, 4 në “Europa League” dhe 2 në “Coppa Italia”.
Ndërsa një vit më pas, Berisha doli në fushë 10 herë në Serie A dhe 7 në Kupën e Italisë, duke arritur deri në finale. Në gusht 2015, Berisha luajti ndeshjen e parë të Champions League, në raundin paraprak me Bayern Leverkusen, duke e mbyllur sezonin me 20 paraqitje.
- Advertisement -
Në seancën e ardhshme të merkatos së verës, Lazio e huazoi atë tek Atalanta, ku bëri debutimin e tij në shtator kundër Cagliarit. Përvoja me zikaltrit zgjati tri sezone për gjithsej 91 paraqitje. Pas dy kampionatesh me Spalin, njëri në Serie A dhe tjetri në Serie B, Etriti kaloi në Torino.
Me ‘granatat’, Berisha doli në fushë në 11 raste. Me kombëtaren shqiptare debutoi në maj të vitit 2012 në miqësoren kundër Iranit, luajti në finalet e Europianit 2016. Në total, deri tani ka luajtur 76 ndeshje me Shqipërinë”.
