UEFA ka marrë vendimin zyrtar për ndeshjen e ndërprerë mes Rumanisë dhe Kosovës, duke e regjistruar atë me rezultat 3:0 në favor të rumunëve. Pas mbledhjes së Komisionit Disiplinor, organi më i lartë i futbollit evropian e ka konsideruar të fajtueshme palën kosovare për tërheqjen nga loja gjatë minutave shtesë dhe për mosbindje ndaj urdhrit të referit për t’u rikthyer në fushën e lojës.
Përveç kësaj, të dyja federatat përkatëse janë dënuar me gjoba. Federata e Futbollit të Kosovës është gjobitur me 6000 euro për sjelljen e pahijshme të ekipit kombëtar, ndërsa Federata Rumune e Futbollit ka marrë një sërë gjobash dhe do të zhvillojë një ndeshje pa praninë e shikuesve për shkak të thirrjeve raciste dhe diskriminuese nga tifozët e saj.
Ky vendim ka shkaktuar reagime të shumta dhe është një nga episodet më të përfolura të sezonit, duke nxjerrë në pah tensionet e krijuara gjatë ndeshjes mes dy ekipeve në Bukuresht.
