Ka qenë një natë me shumë tension mbrëmë në Napoli, me përplasje mes policisë dhe tifozëve të Union Berlin në prag të ndeshjes së Champions League. Në stadiumin “Maradona”, prej orës 18:45 të ditës së sotme, do të përballen kampionët e Italisë dhe gjermanët.
Mbështetësit e Union Berlin, dy mijë prej të cilëve mbërritën në qytetin italian, të gjithë të veshur me xhupa ngjyrë bezhë, u zhvendosën si grup në zemër të Napolit, ku demonstruan vandalizëm dhe akte të ndryshme dhune.
Më pas janë përplasur me policinë dhe karabinierët, që kanë tentuar t’i frenojnë. Vendi i përplasjes së ashpër fizike ishte “Corso Umberto” dhe “Via Medina”, jo shumë larg komisariatit të policisë, ndërsa në “Piazza Dante”, në qendrën historike të Napolit, gjermanët hodhën bomba tymuese dhe fishekzjarre ndaj mjeteve të blinduara të policisë, të pranishme në masë.
Policia kishte zbarkuar në terren për të parandaluar çdo kontakt me ultrasit e Napolit. Xhama dyqanesh dhe makina të dëmtuara, kazanët e mbeturinave të përmbysura dhe rrugët e bllokuara. Kjo është pak nga gjithçka që ndodhi. Në aksion ishin rreth 200 ultras gjermanë. Gjatë incidenteve, disa policë mbetën të mavijosur ose plagosur lehtë.
- Advertisement -
Raporti flet për 11 tifozë gjermanë të arrestuar në luftën guerile urbane, e cila mezi u vu nën kontroll, për të thënë të paktën, nga policia. Tashmë objektivi është që incidentet të mos përsëriten, sidomos duke pasur parasysh ardhjet e reja nga Gjermania. Parësore është shmangia e çdo kontakti me tifozët e Napolit.
