Skuadra e Paris Saint-Germainit, ka mbetur pa njërin prej lojtarëve kryesor për pjesën më të rëndësishme të sezonit. Sulmuesi i Brazilit, Neymar e ka mbyllur sezonin para kohe për shkak se ditëve në vijim do t’i nënshtrohet një operimi, i cili do ta detyrojë të pauzojë për katër muaj.
Mungesën e Neymarit e ka konfirmuar të hënën skuadra nga Ligue 1, e cila po lufton për ta fituar trofeun e Ligës së Kampionëve këtë edicion. Megjithatë, Neymar nuk do të jetë në gjendje ta ndihmojë ekipin duke filluar nga ndeshja e kthimit kundër Bayern Munichut. Dueli i dytë në kuadër të 1/8 së finales mes PSG-së dhe Bayernit, zhvillohet të mërkurën mbrëma në stadiumin “Allianz Arena” të Munichut. Neymar luajti për 90-të minuta në ndeshjen e parë të zhvilluar më 11 shkurt në Paris, por nuk arriti ta ndihmojë ekipin për ta evituar humbjen 1:0. Ai këtë javë do të shkojë drejt Dohas për t’iu nënshtruar operimit të nyjës së këmbës. Sipas klubit, ky lëndim ka disa vite që po e mundon sulmuesin 31-vjeçar.
“Neymarit i janë paraqitur disa episode të paqëndrueshmërisë në kyçin e këmbës së djathtë në vitet e fundit”, thuhet në njoftimin e lëshuar nga PSG-ja. “Pas ndrydhjes së tij të fundit më 20 shkurt, stafi mjekësor i Paris Saint-Germainit rekomandoi një operacion riparimi të ligamenteve për të shmangur një rrezik të madh të përsëritjes. Të gjithë ekspertët e konsultuar e kanë konfirmuar këtë domosdoshmëri”.
Neymari e pësoi lëndimin e tij të fundit muajin e shkuar në ndeshjen kampionale ndaj skuadrës së Lillet, të cilën PSG-ja e fitoi me rezultatin e ngushtë 4:3. Ai shënoi një gol dhe dhuroi një asistim në këtë triumf, ndërsa u detyrua të largohet nga fusha në fillim të pjesës së dytë. Ai gjithashtu e lëndoi nyjën e këmbës së djathtë në ndeshjen hapëse të Brazilit në Botërorin “Katari 2022” që u mbajt në fund të vitit të shkuar, por ishte në gjendje të rikthehej më vonë në turne. Megjithatë, përkundër kthimit në fushë, Neymar nuk arriti ta ndihmojë Brazilin për ta evituar eliminimin në çerekfinale nga Kroacia. Ndërkohë, këtë edicion te PSG-ja, ai ka shënuar 18 gola dhe ka asistuar 17 herë në 29 paraqitje në të gjitha garat.
