Një ndihmë konkrete dhe në rrethana aspak të dukshme. Ja çfarë i garanton Neymar, mikut të tij Dani Alves, i cili prej pak më shumë se një viti ndodhet në burgun e Barcelonës me akuzën e abuzimit seksual ndaj një vajze 23-vjeçare.
Sipas asaj që është konstatuar nga “UOL Esporte’, ka qenë “O Ney”, ai që është kujdesur për shpenzimet ligjore me të cilat është përballur deri tani ish-mbrojtësi i Brazilit në pritje të gjyqit (të cilin Gjykata e Barcelonës e ka caktuar për 5 shkurtin e ardhshëm).
Neymar ka paguar edhe garancinë e parashikuar të fondit të kompensimit, të vendosur nga Prokuroria. Jo vetëm kaq, sulmuesi brazilian ka vënë në dispozicion të Alves edhe një ekspert të njohur të ligjit penal, i cili ka ndihmuar familjen e tij për vite me radhë, avokatin Gustavo Xisto.
Zbulimi i “UOL” bazohet në dëshminë e tri burimeve të afërta me sulmuesin brazilian dhe në lëvizjet e kryera në llogarinë bankare të babait të Neymar. Neymar do të përballojë gjithmonë kostot e studios së re ligjore që mori përsipër çështjen e Alves vetëm katër muaj më parë.
- Advertisement -
Kjo për të ndihmuar mikun, i cili ndërkohë është përfshirë edhe nga një krizë e fortë financiare, pas ngrirjes totale të aseteve të tij (përfshirë llogarinë bankare), të vendosur nga drejtësia braziliane në përgjigje të ankesës së paraqitur verën e kaluar nga ish-gruaja dhe ish-bashkëshortja e tij, Dinorah Santana, për mospagesë të alimentacionit prej 2.5 milionë euro.
Ndërkohë ka nisur numërimi mbrapsht për Dani Alves drejt gjyqit që mund ta dënojë me 12 vite burg, dënimi maksimal i parashikuar për krimin për të cilin akuzohet. Ish-mbrojtësi brazilian vazhdon të hedhë poshtë akuzat për përdhunim, duke pretenduar se ajo që ndodhi në banjat e zonës VIP të klubit të natës “Sutton”, në fund të dhjetorit 2022, ishte një marrëdhënie e thjeshtë konsensuale.
Në vend të kësaj, prokuroria kërkon drejtësi duke raportuar një abuzim të vërtetë, pikërisht siç hipotezojnë hetuesit pas analizimit të provave dhe dëshmive të mbledhura gjatë një viti hetimesh.
Avokatët e dy palëve, sipas asaj që zbulojnë mediat spanjolle, kanë kërkuar vazhdimisht një marrëveshje, duke intensifikuar kontaktet dhe takimet në tre muajt e fundit. Natyrisht, të gjitha të kota, aq sa Alves do të gjykohet saktësisht pas një muaji në sallat e gjyqit të kryeqytetit katalanas.
