Ministria e Kulturës, Rinisë dhe Sportit (MKRS) ka nënshkruar memorandumet e bashkëpunimit me federata sportive për zhvillimin e aktiviteteve të tyre vjetore përgjatë vitit 2024.
Këtë e ka bërë të ditur vetë MKRS përmes një postimi në “Facebook”, shkruan rtv21.tv.
“Buxheti total për këto memorandume sivjet është rritur për mbi 53% në krahasim me vitin e kaluar, gjersa përfitues janë në total 35 federata, të gjitha ato që janë të licencuara në MKRS”, ka shkruar MKRS.
Tutje bëhet e ditur se buxheti vjetor i federatave është përcaktuar përmes shumëzimit të pikës nga vlerësimi në kategorizim dhe vlerës së pikës të përcaktuar nga Ministri, dhe këtë vit është përcaktuar të jetë 3000 euro për secilën kategori.
- Advertisement -
“Kjo është hera e parë që nënshkrimi i memorandumeve vjetore me federatat sportive është bërë kaq herët, përkatësisht në javën e parë të muajit shkurt, që nënkupton se ato do ta kenë buxhetin në dispozicion shumë më herët se sa në vitet e kaluara”, shkruan tutje MKRS./21Media
