“Sotheby’s” po nxjerr në ankand gjashtë fanella që Lionel Messi i veshi gjatë marshimit triumfues të Argjentinës në Kupën e Botës të vitit të kaluar në Katar. Kjo shtëpi ankandesh vlerëson se ato mund të bëhen veshjet sportive me vlerën më të lartë në histori, ndoshta mbi 10 milionë dollarë.
Shitja do të zhvillohet në Nju Jork. Në ankand do të dalin gjashtë nga shtatë fanellat e pjesëve të para që kapiteni argjentinas kishte veshur në Katar, përfshirë atë të fitores dramatike kundër Francës në finale.
Argjentina fitoi me penallti në finalen e Lusail, pas barazimit 3-3 në kohën e rregullt dhe shtesën 30 minutëshe. Kjo ishte Kupa e tretë e Botës për Albiceleste. Messi shënoi dy gola në finale. Tetë herë fituesi i “Topit të Artë” ka njoftuar në llogarinë e tij në Instagram se një pjesë e parave të mbledhura do të dhurohen për spitalet e fëmijëve.
“Sotheby’s”, themeluar në Londër në 1744, do t’i ofrojë bluzat e Messit në Nju Jork midis 30 nëntorit dhe 14 dhjetorit. Bluzat do t’i shfaqen publikut falas gjatë atyre datave. Drejtuesi i ankandit do të bashkëpunojë me “AC Momento”, një kompani me bazë në SHBA, që ka partneritet me sportistët më të mirë për të menaxhuar veshjet që përdornin në garat e tyre.
- Advertisement -
Rekordi aktual në ankande të tilla e mban fanella që Michael Jordan veshi në finalet e NBA më 1998, e cila u shit për 10.1 milionë dollarë. Rekordin aktual për një bluzë futbolli e mban ajo që Diego Maradona veshi në fitoren 2-1 të Argjentinës ndaj Anglisë, në çerekfinalen e Kupës së Botës 1986, me të cilën ai shënoi një gol me dorë, i përfundoi duke u quajtur “Dora e Zotit”.
Kjo bluze e Maradonës u shit për 9.3 milionë dollarë në “Sotheby’s”, në Londër, në maj 2022. Në Instagram, Messi specifikoi se “një pjesë e të ardhurave nga ankandi do t’i dhurohet projektit UNICAS, të udhëhequr nga Spitali i Fëmijëve Sant Joan de Déu (SJD) në Barcelonë për të mbuluar nevojat e fëmijëve që vuajnë nga sëmundje të rralla.
