Lionel Messi ka blerë një rezidencë të madhe në Fort Lauderdale për 10.8 milionë dollarë, duke u sistemuar plotësisht e në çdo drejtim tek Inter Miami. Shtatë herë fituesi i “Topit të Artë” po kërkonte një bazë të përhershme për të strehuar familjen e tij, që kur u transferua nga PSG në SHBA.
Ai tani ka zbuluar se ka blerë një pronë në Florida, që përmban 10 dhoma gjumi, një dhomë spa, dy doke varkash dhe një pishinë. Vendbanimi i ri i Messit shtrihet në 10.500 metra katrorë dhe gjithashtu krenohet me një garazh për tri makina.
Është vetëm 15 minuta nga stadiumi DRV PNK i Inter Miami dhe objekti stërvitor ngjitur klubit, çka do të thotë se argjentinasi nuk ka justifikim për vonesën në lojëra dhe stërvitje përpara se skuadra të kalojë në terrenin e ri që po ndërtohet, në vitin 2025.
Messi ka shpenzuar tashmë 7.3 milionë dollarë për blerjen e të gjithë katit të nëntë në Regalia, një ndërtim superluksoz i godinës në rajonin “Sunny Isles Beach” të Floridës. Kompletimi dhe disa gjëra shtesë do ta rrisin më shumë vlerën totale të shpenzuar për këtë strehë të re.
- Advertisement -
Kolegu i argjentinasit, Sergio Busquets, jeton pikërisht në rrugën e blerjes së tij të fundit në “Sea Ranch Lakes”. Messi ka pasur ndikim të menjëhershëm që kur u lidh me Inter Miami, duke e ndihmuar skuadrën me president David Beckham të fitojë trofeun e parë në histori, Kupën e Ligës.
