Ceremonia e ndarjes së çmimeve, e organizuar nga UNFP (Sindikata e Lojtarëve Francezë), nderoi arritjet e jashtëzakonshme të Kylian Mbappe. Ky i fundit po largohet nga PSG me një tjetër titull kampioni të Ligue 1. Gjatë gjithë sezonit, 25-vjeçari tregoi aftësitë e tij të jashtëzakonshme në shënimin e golave, duke realizuar një total mbresëlënës prej 44 golash në të gjitha garat për klubin parizien. 27 prej tyre janë shënuar në kampionatin francez, në 29 paraqitje.
Mbappe do t’i japë lamtumirën PSG-së pas një periudhe 7-vjeçare në “Parc des Princes”. Sulmuesi u emocionua pak gjatë fjalimit të tij përshëndetës dhe pranoi se “do t’i mungonte Ligue 1 me siguri”, ndërsa po përgatitet për një sfidë të re në karrierë:
“Është një faqe që po kthehet, një kapitull i jetës sime po mbyllet. Ligue 1 do të ketë gjithmonë një vend të rëndësishëm në jetën time. Është liga e vetme që kam njohur në karrierën time deri tani. Gjithmonë jam përpjekur të jem një përfaqësues i nderuar i kësaj lige. Do të më mungojë me siguri”.
Ylli francez ka shkruar edhe një mesazh emocionues për tifozët e PSG-së në Instagram: “Emocione të mëdha për këtë titull të 5-të të lojtarit më të mirë në Ligue 1. Një falenderim i madh për dashurinë që më keni dhënë. Unë kurrë nuk do t’i harroj ato momente të veçanta që kam mundur të kaloj me ju. Nuk do t’ju harroj kurrë, përgjithmonë mirënjohës!”
- Advertisement -
Mbappe foli edhe për “L’Equipe”, me këtë rast, duke u ndalur te lamtumira e tij të afërt me PSG-në: “Është e vështirë, shumë më tepër se sa mund të duket. Është një kapitull i jetës sime që po mbyllet. Në Paris kam luajtur me lojtarë të jashtëzakonshëm, trajneri ka pasur gjithmonë besim tek unë, ashtu si stafi mjekësor, të gjithë njerëzit e klubit, drejtuesit sportivë dhe presidenti, Lartësia e Tij, Emiri, që erdhi për të më marrë në moshën 18-vjeçare dhe për të vënë bast për mua.
Jam këtu për të falënderuar dhe shlyer besimin që më është dhënë në kohët e mira dhe të këqija, para se të largohesha. Faleminderit të gjithëve, ka qenë një rrugëtim i gjatë dhe jam shumë i lumtur. Kam shumë emocione, sepse mendoj për gjithçka që kam kaluar, nga ‘Clairefontaine’ në Monaco. Do të largohem nga vendi im, do të nis një jetë të re si burrë.
Gjithmonë kam shikuar përpara. Kur dëshiron të jesh ai që dua të jem, ka gjithmonë diçka përpara. Kur marr disa sekonda kohë për ta parë të kaluarën i them vetes se ka qenë një rrugëtim i mrekullueshëm. Kam qenë në kontakt me lojtarë unikë, kam pasur ndikim në kampionatin tonë, nuk jam i befasuar më me asgjë. Për mua ishte kënaqësi e madhe të luaja në një vend unik, për një klub unik.
Kur do ta shpall klubin tim të ardhshëm? Në jetë duhet të merrni kohë për gjithçka. E vetmja gjë që duhet të dini është se unë po largohem nga PSG. Pjesa tjetër ndoshta nuk është koha për ta zbuluar”.
