Kylian Mbappé ka folur për atë që ka në mendje këto ditë: çerekfinalet e Champions League. Si zakonisht në ndeshjet e fundit të Ligue 1, ylli i PSG nuk luajti 90 minutat kundër skuadrës së vendit të fundit, të shtunën e kaluar, Clermont.
Në fakt, ai hyri në lojë në pjesën e dytë, pasi Luis Enrique vendosi të bënte rotacione katër ditë para angazhimit evropian. Epo Mbappé nuk mundi t’iu jepte gëzim tifozëve të tij, teksa ndeshja përfundoi 1-1. Sidoqoftë, Kylian e bëri të qartë se ajo që do të vijë të mërkurën është diçka shumë ndryshe.
“Është koha për lojtarë të mëdhenj”, – tha francezi për “Telefoot”, duke iu referuar ndeshjes kundër Barcelonës, këtë mesjavë. Sulmuesi 25-vjeçar është golashënuesi më i mirë i këtij Champions-i me 6 gola, po aq sa Haaland, Griezmann dhe Kane. Ai thotë se është i përgatitur për çdo gjë që vjen.
“Jam gati dhe, si gjithmonë, nuk do të fshihem”, – tha Mbappe i bindur, duke paralajmëruar Barçën, një skuadër me të cilën është përballur tashmë në 1/8 finale të kompeticionit kryesor të klubeve europiane në sezonin 2020/21. Në ndeshjen e parë të atij sezoni, Mbappé shënoi një “hat-trick” kundër Blaugranëve në “Camp Nou”.
- Advertisement -
“Duke parë dinamikën që kemi, jam i sigurt se do të japim gjithçka, pastaj rezultati… është në dorën e Zotit, – ka shtuar futbollisti, i cili ka theksuar edhe momentin aktual të sezonit: – Si çdo vit hyjmë në periudhën vendimtare të sezonit. Në fund të prillit tashmë do të kemi elementë për të ditur se çfarë sezoni do të mund të kemi”.
Që kur Mbappé e njoftoi klubin parizien se nuk do ta rinovojë kontratën e tij, Luis Enrique e ka ulur atë në stol, në shumë raste. Megjithatë, francezi po shënon gola javë pas jave dhe performanca e tij vetëm sa po përmirësohet. “Jam shumë i lumtur me të”, – tha trajneri asturian, i cili në garat me eliminim direkt si Kupa e Francës dhe Liga e Kampionëve e trajton sulmuesin e tij si titullar të padiskutueshëm.
