Duket se Luis Suarez nuk do të nënshkruajë përfundimisht për Inter Miami. Sulmuesi 36-vjeçar uruguajan ka qenë në radarin e skuadrës amerikane javët e fundit, me mundësinë e bashkimit me Leo Messin, Sergio Busquets dhe Jordi Alba, por duke marrë parasysh deklaratat e fundit nga klubi i tij aktual, Gremio, nuk do të të jetë kështu.
Vetë Renato Portaluppi, trajner i skuadrës së lartpërmendur braziliane, së fundi ka përjashtuar mundësinë që së shpejti ta humbasë Luis Suarez: “Marrëveshja me Inter Miami nuk do të bëhet. Luis do të qëndrojë me ne deri dhjetorin e vitit 2024. ‘Telenovela’ ka mbaruar”.
Nga këtu, mbetet të shihet nëse mund të ketë lëvizje të reja në këtë drejtim. Me sa duket, vullneti i Luis Suarez është që të luajë sërish, në të njëjtin ekip, me mikun e tij Leo Messi. Megjithatë, ai ka ende një vit e gjysmë kontratë për të përmbushur me Gremio, skuadër ku u transferua në fillim të këtij viti.
