Presidenti i FFK-së, Agim Ademi, i cili ndodhet në Paris për gala mbrëmjen e ndarjes së çmimeve për më të mirët e vitit “The Best FIFA Football Aëards 2022”, sot është pritur nga kreu i FIFA-së, Gianni Infantino.
Numri një i futbollit tonë përmes llogarisë, ka thënë së çdo takim me presidentin Infantino është mundësi e mirë për të biseduar për zhvillimin e futbollit.
Sipas Ademit, në këtë takim është shprehur dëshira për të ndihmuar zhvillimin e futbollit kosovar me projekte të përbashkëta.
“Si gjithmonë edhe kësaj radhe u prita me përzemërsi nga presidenti i FIFA-s në Paris. Jam shumë mirënjohës ndaj presidentit Gianni Infantino për respektin dhe vlerësimin që ka për mua dhe për FFK-në. Çdo takim me të parin e FIFA-s është mundësi e mirë për të diskutuar për futbollin e Kosovës. Futbolli është pasioni që na bashkon dhe për të cilin jemi krenarë. Në këtë takim shprehëm dëshirën për të rritur tutje futbollin në Kosovë me projekte të përbashkëta, teksa presidenti Infantino më uroi fat e rrugëtim të suksesshëm me Kombëtaren në ciklin kualifikues Euro 2024. Për mua është nder dhe kënaqësi që kam arritur të krijoj raporte te këtilla me liderët e futbollit evropian dhe botëror si Aleksander Çeferin dhe Gianni Infantino, por edhe me sektorët e tjerë të futbollit. Detyra ime si udhëheqës i FFK-së është të prezantoj, të ndërtoj raporte dhe të punoj me zell e saktësi me të gjitha institucionet vendore dhe ndërkombëtare, duke garantuar se zëri i klubeve, futbollistëve dhe akterëve të tjerë të futbollit të dëgjohet në mënyrë të pastër, reale dhe të drejtë kudo”, ka shkruar Ademi.
