Kryetari i Federatës së Futbollit të Kosovës, Agim Ademi, ka shprehur bindjen se Kosova do të kualifikohet në kampionatin evropian të futbollit që pritet të mbahet më 2024 në Gjermani.
“Kosova dhe populli ynë, presin nga ne kualifikimin historik. Jam i bindur se nuk do t’i zhgënjejmë”, ka thënë ai të premtën, përmes një adresimi në faqen e tij në rrjetin social Facebook.
Kosova do t’i luajë dy ndeshje këtë muaj. Fillimisht ndaj Izraelit si mysafir dhe pastaj e pret Andorrën.
“Jam i bindur se me punën dhe përkushtimin e përbashkët, do t’ia dalim të arrijmë kualifikimin historik, të cilin e kanë ëndërruar shumë gjenerata”, ka thënë Ademi. “Natyrisht se ky rrugëtim nuk do të jetë aspak i lehtë, por pavarësisht kundërshtarëve dhe sfidave që kemi para vetes, kam besim të madh në cilësitë, talentin dhe punën e futbollistëve, trajnerëve dhe stafit të Kombëtares”.
- Advertisement -
Ai ka folur edhe për formën e futbollistëve.
“Forma e futbollistëve tanë është inkurajuese, derisa vullneti e motivi drejt kualifikimit në Euro 2024, është maksimal”, ka thënë Ademi.
“Ky cikël kualifikues është një mundësi e mirë që të tregojmë forcën dhe talentin tonë si ekip kombëtar”, është shprehur ai.
