Sot shënohet një nga datat më domethënëse në historinë e sportit dhe shtetformimit të Kosovës – 13 maji i vitit 2016, dita kur Federata e Futbollit të Kosovës (FFK) u pranua zyrtarisht në FIFA.
Në Kongresin e 66-të të FIFA-s, të mbajtur në Meksikë, Kosova u bë anëtarja e 210-të e këtij institucioni prestigjioz të futbollit botëror, duke marrë 141 vota nga 164 gjithsej.
Presidenti i FFK-së, Agim Ademi, përmes një postimi në rrjete sociale, ka reflektuar mbi këtë rrugëtim të jashtëzakonshëm që nisi në kushte të vështira, por që sot konsiderohet histori suksesi.
“Ky rrugëtim nisi në rrethana të vështira, me hapa të guximshëm dhe shumë sakrificë. Nga puna vizionare e Agim Bytyqit dhe bashkëpunëtorëve të tij gjatë kohës së okupimit, te rezistenca e palëkundur nën drejtimin e Rexhep Abdullahut, mbijetesa e futbollit nën udhëheqjen e Sabri Hashanit, e deri te ndërkombëtarizimi nën udhëheqjen e legjendës Fadil Vokrri – të gjitha këto faza kanë ndërtuar themelet e forta të futbollit tonë,” ka shkruar Ademi.
- Advertisement -
Ai theksoi se përmes përkrahjes nga UEFA dhe FIFA, si dhe përkushtimit të strukturave të FFK-së, futbolli në Kosovë ka shënuar përparim të dukshëm në të gjitha segmentet – nga grupmoshat e reja e futbolli i femrave, te përmirësimi i infrastrukturës dhe ngritja e standardeve profesionale.
Ademi e quajti këtë ditë një moment reflektimi dhe mirënjohjeje për të gjithë ata që kanë kontribuar në zhvillimin e futbollit ndër vite – përfshirë futbollistë, trajnerë, drejtues klubesh, administratorë, donatorë dhe partnerë ndërkombëtarë.
Ai falënderoi në veçanti presidentin e FIFA-s, Gianni Infantino, për mbështetjen e vazhdueshme ndaj Kosovës, duke theksuar rëndësinë që ka përfaqësimi i vendit në ngjarje të tilla ndërkombëtare.
“Jam veçanërisht i nderuar që pikërisht sot, në këtë përvjetor të rëndësishëm, ndodhem në Paraguai për të përfaqësuar Kosovën në Kongresin e 75-të të FIFA-s – një moment që pasqyron më së miri rrugëtimin tonë të jashtëzakonshëm dhe pozitën e merituar që kemi fituar në skenën ndërkombëtare të futbollit,” përfundoi Ademi.
