Manchester City është drejt një momenti historik, teksa po mbyll një sezon fantastik. Me titullin në Premier League që tashmë nuk duket problem për ta fituar, Pep Guardiola me të tijtë synojnë edhe dy trofe, sidomos Champions League, çka do të ishte historike për këtë klub që në dekadën e fundit po dominon në futbollin britanik.
Për momentin i gjithë fokusi tani është te gjysmëfinalja e kthimit në “Etihad” pas barazimit 1-1 ndaj Real Madrid në “Bernabeu”. Pasi mori fitoren e 11-radhazi në kampionat, trajneri Guardiola u shpreh:
“Jemi e vetmja skuadër në Europë që luftojmë për të gjitha kompeticionet. Jemi në finalen e Kupës kundër United dhe në finish të Premier League në rrugën e duhur. Por të luajmë në gjysmëfinalen e Champions-it në shtëpi, përpara njerëzve tanë dhe duke u përpjekur për të arritur në finale, është një arritje e jashtëzakonshme”, – u shpreh Guardiola, i cili kërkon të rifutet në histori, ashtu siç bëri me Barcelonën vite më parë.
Nëse City mposht Realin, në qershor do të ketë dy finale, më datë 3 finalja e Kupës ndaj Manchester United dhe më 10 qershor finalen e Champions League.
