Fitore me përmbysje, tri pikë të tjera dhe tani mendon për Real Madridin. Performanca e Kevin de Bruyne në “Selhurst Park” i lejoi Manchester City, përveç presionit ndaj konkurrentëve për titullin e Premier League, të fokusohet në duelin evropian pa asnjë shqetësim, përveç lojtarëve të rikuperuar si Kyle Walker apo Nathan Aké.
Në konferencën për shtyp pas ndeshjes së radhës në kampionat, Pep Guardiola deklaroi se “nuk ishim aq solidë si zakonisht, por Kevin de Bruyne e fitoi ndeshjen”. Trajneri spanjoll, i cili e kuptoi nevojën për t’u kujdesur për tranzicionet në mbrojtje përpara përballjes me “Los Blancos”, shpreson të mos pendohet për dëmtime të tjera.
“A mora përgjigjen që dëshiroja nga lojtarët? Po, por nuk ishim solidë si zakonisht, përsa i përket organizimit në mbrojtje dhe tranzicioneve, veçanërisht në mënyrën se si pësuam golin e parë dhe rastet e tjera. Kjo ndodhi më shumë për shkak të të luajturit çdo tri ditë. Shpenzohet më shumë energji mendore sesa energji fizike, është sforcim i jashtëzakonshëm.
Kjo është arsyeja pse ndonjëherë ndodh (goli i pësuar), por kësaj here Kevin e fitoi ndeshjen. Në këto lloj ndeshjesh, një herë është Phil (Foden), herën tjetër Erling (Haaland) apo Julián (Álvarez), lojtarët sulmues që e vendosin lojën. Ne trajnerët flasim për taktika, por më jepni lojtarë si Kevin dhe këto lloj lojërash do të jenë më të lehta”.
- Advertisement -
Sa e rëndësishme ishte për Erling Haaland që të shënonte: “Absolutisht e rëndësishme. Sulmuesit jetojnë për golin, ju e dini. Mund ta gjenim më shumë në këtë ndeshje, veçanërisht në të djathtë. Ai lëvizi shumë mirë”.
Ekipi vuajti disi mbrapa. A mund të jetë problem të martën, kundër Real Madridit, i cili ka lojtarë shumë të shpejtë si Vinicius dhe Rodrygo? Ja si përgjigjet Guardiola: “Po, e di arsyen pse ndodhi kjo dhe keni të drejtë. Duhet ta rregullojmë, përndryshe do të jetë e vështirë. Kundërshtari në Champions ka shumë cilësi, iu druhem vërtet sulmuesve të shpejtë dhe driblues që ka Real Madridi”.
