Barça-Atalanta është një nga super sfidat që rezervon mbrëmja e sotme në Champions League, një përballje mes dy ekipeve që luajnë një futboll të bukur ofensivë. “Armata” i Hansi Flick është një nga dy ekipet e vetme, së bashku me Liverpool, që ka siguruar kualifikimin për në fazën e 1/8, ndërsa bergamaskët kanë siguruar minimalisht prezencën në “play-off”, por ekipi “azzurr” kërkon të kualifikohet direkt, fakt që e pranoi edhe Berat Gjimshiti në konferencë për shtyp:
“Nëse fitojmë shkojmë direket në 1/8, është një stimul më shumë për ne për të bërë mirë kundër një skuadre të madhe si Barcelona”, u shpreh Gjimshiti.
Kapiteni kuqezi u pyet nga gazetarët në konferencë për shtyp edhe për titullin e marrë së fundmi si lojtari i kombëtares më i mirë i vitit: “Jam shumë krenar dhe i lumtur, ky është një çmim që më jep më shumë motivim për Atalantën dhe Kombëtares”, u shpreh Gjimshiti.
Në të njëjtën linjë me kapitenin kuqezi ishte edhe trajneri Gasperini: “Në fillim do kishim firmosur për play-off, por tani që jemi këtu do ta luajmë. Barça është një ekip i fortë, të gjithë mund të shënojnë gola, por si çdo skuadër edhe ata kanë pika të dobëta”, theksoi trajneri i Atalanta-s.
- Advertisement -
Pavarësisht se ekipi i tij është i kualifikuar për në fazën e 1/8 në Champions, Hansi Flick theksoi se ekipi i tij zbret në fushë për të fituar: “Objektivi ynë është ta mbyllim në vendin e dytë, edhe pse më duhet të them se për mua kampionati spanjoll është objektivi kryesor për të fituar. Kam respekt për Gaspetinin, për ekipin e tij, zhvillojnë një lojë unike”, u shpreh Flick në konferencë për shtyp.
