Barcelona ka shënuar një fitore të rëndësishme në kuadër të javës së 33-të të La Ligës, duke e mposhtur Mallorcën me rezultat minimal 1-0 në ndeshjen e zhvilluar në “Estadi Olímpic Lluís Companys”.
Goli i vetëm i takimit u realizua në fillimin e pjesës së dytë, kur Dani Olmo gjeti rrjetën në minutën e 46-të, pas një asistimi preciz nga Eric Garcia, duke i siguruar tri pikët skuadrës së Hansi Flick.
Pjesa e parë përfundoi pa gola, megjithëse të dy ekipet patën raste të mira për të kaluar në epërsi. Në fraksionin e dytë, pas golit të hershëm, blaugranët administruan rezultatin përmes posedimit dhe menaxhimit të ritmit të lojës, duke shmangur rrezikun nga kundërshtari.
Në këtë përballje mungoi sulmuesi kosovar Vedat Muriqi, i cili nuk u aktivizua nga trajneri i Mallorcës.
- Advertisement -
Me këtë fitore, Barcelona ngjitet në 76 pikë dhe ruan një avantazh prej shtatë pikësh ndaj ndjekësit më të afërt, Real Madridit, që ka 69 pikë. Mallorca, pavarësisht humbjes, mban vendin e shtatë në tabelë me 44 pikë.
