Liga e Evropës do të mbyllet sonte me një finale tërësisht angleze, ku Tottenham Hotspur dhe Manchester United do të përballen në stadiumin San Mamés të Bilbaos, me fillim nga ora 21:00.
Përveç prestigjit që sjell ky trofe evropian, të dy skuadrat kanë edhe një arsye shtesë për ta synuar me ngulm fitoren: triumfi në këtë garë siguron automatikisht pjesëmarrjen në fazën grupore të Ligës së Kampionëve për edicionin e ardhshëm.
Rruga deri në finale
Tottenhami arriti në finalen e madhe pas një paraqitjeje të bindshme në fazat eliminatore. Londinezët mposhtën lehtësisht Bodo/Glimt në gjysmëfinale, ndërsa në çerekfinale kishin eliminuar Eintracht Frankfurtin.
- Advertisement -
Nga ana tjetër, Manchester United kaloi Athletic Bilbaon me lehtësi në gjysmëfinale, ndërsa paraprakisht kishte mposhtur Lyonin në çerekfinale.
Forma dhe përballjet e fundit
Në duelet e fundit direkte mes tyre, Spurs kanë treguar epërsi të qartë. Ata kanë fituar katër dhe kanë barazuar dy nga gjashtë përballjet e fundit me “Djajtë e Kuq”. Manchester United nuk ka shënuar fitore ndaj Tottenhamit që nga viti 2022.
Megjithatë, kur bëhet fjalë për garat evropiane, përvoja është në anën e Manchester United, që shihet si favorit i lehtë në këtë përballje, falë historikut dhe traditës në arenën ndërkombëtare.
Një trofe që mund të shpëtojë sezonin
- Advertisement -
Të dy klubet vijnë në këtë finale me sezon jo plotësisht të suksesshëm në kampionat, ndaj Europa League shihet si mundësi e fundit për të shpëtuar edicionin 2024/2025. Për skuadrën që del humbëse, kjo mund të përkthehet në një fund zhgënjyes të sezonit dhe në mungesë të garave elitare evropiane vitin e ardhshëm.
