P♪7rfaqësuesja e Kosovës U16 ka shënuar një tjetër sukses në kuadër të UEFA Development Tournament, që po zhvillohet në Shqipëri, duke mposhtur Andorrën me rezultat 2:1.
Pas fitores bindëse kundër San Marinos (7:0), Dardanët e rinj të drejtuar nga trajneri Mehmet Kurda, treguan edhe një herë formën e mirë në ndeshjen e dytë të turneut, duke siguruar fitoren e dytë radhazi.
Unejs Mustafa ishte hero i kësaj përballjeje, duke realizuar të dy golat për Kosovën. Ai e kaloi ekipin në epërsi në minutën e 40-të dhe më pas dyfishoi rezultatin në fillim të pjesës së dytë (48’), duke vulosur fitoren.
Në minutat e fundit, Andorra ngushtoi rezultatin në 2:1, por nuk arriti të rrezikojë seriozisht epërsinë e Kosovës.
- Advertisement -
Pas ndeshjes, Mustafa u shpreh i kënaqur me paraqitjen:
“Jam shumë i lumtur që shënova dy gola. Është fitorja e dytë me Kombëtaren e Kosovës dhe shpresoj të vazhdojmë kështu. Besoj se edhe ndaj Shqipërisë do të kemi sukses”, deklaroi ai.
Edhe trajneri Kurda vlerësoi angazhimin dhe karakterin e lojtarëve:
“Edhe sot djemtë treguan një karakter të fortë. Përballë një kundërshtari të vështirë, arritëm ta menaxhojmë lojën dhe të sigurojmë një tjetër fitore. I përgëzoj për paraqitjen dhe përkushtimin”, tha ai pas ndeshjes.
Kosova U16 do të zhvillojë ndeshjen e fundit në këtë turne më 25 prill, përballë Shqipërisë, me synimin për ta mbyllur turneun me sukses të plotë.
