Në qendër të mbrojtjes së Atalantës qëndron një figurë sa solide, aq edhe e heshtur: Berat Djimsiti. Mbrojtësi dhe kapiteni i kombëtares shqiptare, gati për të festuar 200 ndeshjet e tij në Serie A, e ka “hapur zemrën” për “L’Eco di Bergamo”. Një reflektim mbi rolin e tij kyç në skuadrën zikaltër, si dhe ambiciet personale, ekipore.
MES TË KALUARËS DHE TË ARDHMES – “Të ndihesh rehat në rolin që luan është thelbësore, – thotë Djimsiti. – Të qenit në qendër të mbrojtjes së Atalantas është një përgjegjësi, që më ka lejuar të piqem si lojtar dhe si person”.
NJË EKIP EVOLUTIV – Skuadra e Gasperinit po përjeton një moment forme pozitive, duke konsoliduar procesin e rritjes që shkon përtej performancës së pastër sportive. “Fitorja nuk është thjesht një rezultat, por katalizator për rritjen e besimit”, – thotë Djimsiti, duke shprehur dëshirën për të ngritur një trofe me fanellën zikaltër.
STABILITETI DHE LIDERSHIPI – “Historia ime tek Atalanta ka qenë një rrugëtim i rritjes së vazhdueshme, – nënvizon Djimsiti. – Të ndjehesh pjesë përbërëse e projektit zikaltër është një nder, që më shtyn të jap gjithmonë më të mirën time”.
- Advertisement -
PERSPEKTIVAT PËR TË ARDHMEN – Kur vjen puna tek e ardhmja, Djimsiti nuk i fsheh aspiratat e tij: “Ëndrra e çdo futbollisti është të fitojë trofe, edhe unë kam ambicie ta realizoj këtë ëndërr si në nivel klubesh, ashtu edhe me kombëtaren time”.
CHAMPIONS – “Po kalojmë një moment të mirë dhe do të japim gjithçka që të arrijmë sa më lart. Për ta bërë këtë duhet të mposhtim skuadra si Lazio, megjithatë nuk mendojmë për renditjen finale. Gjithmonë kemi menduar për ndeshjen e radhës”.
PA GOLA NË KAMPIONAT – “Është mirë për mua të mos shënoj në Serie A, – buzëqesh shqiptari. – Vazhdoj të shënoj në Evropë, ua lë të tjerëve golat në kampionat”.
MIRANCHUK – “Duke e parë në stërvitje, mendova se ai do të kishte një rrugë më të drejtpërdrejtë. Ka cilësinë dhe teknikën për të qenë një lojtar i madh, të gjithë e dimë prej disa kohësh se cilat janë vlerat e tij”.
KOMBËTARJA – Në funksion të marrjes pjesë në finalet e “Euro 2024” me Shqipërinë e tij dhe finishit të sezonit me Atalantën plot pritshmëri, Djimsiti e vendos veten si një dritë udhërrëfyese, i vetëdijshëm për rëndësinë që ka si brenda, edhe jashtë fushës: “Ndjej përgjegjësi ndaj shokëve të mi dhe të gjithë kombit, që na ndjek me ngrohtësi. Të jesh kapiten i një kombëtareje nuk është e lehtë, kjo më ka dhënë besim edhe nga perspektiva e Atalantës”.
