Xhudistja kosovare Distria Krasniqi ka shkruar një tjetër faqe të artë në historinë e sportit shqiptar, duke fituar medaljen e artë në Kampionatin Evropian për Seniorë 2025, që po mbahet në Podgoricë.
Në finalen e madhe, Krasniqi tregoi klasë dhe përvojë, duke mposhtur kampionen botërore të vitit 2024, italianen Odette Giuffrida. Me këtë fitore, ajo jo vetëm që ngriti flamurin e Kosovës në majën e Evropës, por edhe dëshmoi sërish se është ndër më të mirat në botë.
“Krenarë për Distrian! I solli Kosovës edhe një medalje të artë! Me çdo medalje, ajo shkruan historinë!”, ka shkruar Federata e Xhudos së Kosovës në një postim emocionues në rrjetet sociale.
Rrugëtimi i saj drejt finales ishte po aq mbresëlënës. Pas një raundi të parë të lirë, në raundin e dytë ajo e eliminoi Milica Nikolic nga Serbia. Në çerekfinale triumfoi me Ippon ndaj Naomi Van Krevel të Holandës, ndërsa në gjysmëfinale regjistroi një tjetër fitore të pastër me Ippon kundër Ariane Toro Soler nga Spanja.
- Advertisement -
Distria Krasniqi vazhdon të jetë një nga sportistet më të suksesshme dhe më të lavdishme të Kosovës, duke sjellë krenari dhe frymëzim për gjeneratat e reja.
