Napoli po hyn në fazën vendimtare të sezonit, me vetëm pesë ndeshje të mbetura në kalendar dhe me objektivin për të përmbyllur kampionatin me sukses. Me Antonio Conten në krye, ekipi napoletan synon të mbajë ritmin dhe të sfidojë Interin në garën për kreun, ndonëse rruga drejt suksesit është e mbushur me pengesa.
Tekniku italian, i njohur për aftësinë e tij për të menaxhuar presionin dhe për të fituar tituj, është i vendosur ta çojë skuadrën drejt një përmbylljeje dinjitoze. Megjithatë, ajo që vazhdon ta shqetësojë Conten janë mungesat e vazhdueshme në skuadër, një temë që ka qenë e pranishme gjatë gjithë sezonit.
Në prag të sfidës së radhës kundër Torinos, Napoli përballet sërish me probleme në organikë. David Neres ka pësuar një tjetër dëmtim muskulor, duke i shtuar listës së mungesave, ndërsa qëndrueshmëria fizike e brazilianit mbetet një pikëpyetje gjatë gjithë kampionatit.
Në mbrojtje, shpresa mbetet tek Alessandro Buongiorno, i cili është në garë me kohën për t’u rikuperuar dhe për të qenë gati ndaj ish-skuadrës së tij. Në rast të mungesës së tij, Rafa Marin pritet të startojë, pas një paraqitjeje solide ndaj Monzës.
- Advertisement -
Conte dhe stafi i tij po punojnë për të ndërtuar formacionin më të mirë të mundshëm për sfidat e fundit të sezonit. Që nga përballja me Torinon të dielën mbrëma, çdo ndeshje pritet të jetë vendimtare për fatin e Napolit në këtë edicion të Serie A.
