Një përplasje e ashpër ka ndodhur mes Dani Carvajalit dhe Bukayo Sakës në hyrje të tunelit të stadiumit, menjëherë pas përfundimit të pjesës së parë të ndeshjes çerekfinale të Ligës së Kampionëve mes Real Madridit dhe Arsenalit. Lajmin e ka raportuar gazeta spanjolle Marca, e cila zbulon prapaskenat e një episodi të tensionuar që përfshiu lojtarët dhe stafet e të dy skuadrave.
Edhe pse nuk ishte pjesë e formacionit në këtë ndeshje, Carvajal mori rolin e kapitenit në pushimin e ndeshjes dhe ndërhyri pas penalltisë së realizuar nga Saka me stilin “Panenka” – një goditje që ai e interpretoi si mungesë respekti ndaj klubit madrilen.
Sipas Marca-s, Carvajal ishte ndër të parët që doli në fushë pas sinjalizimit të gjyqtarit për fundin e pjesës së parë. Ai qëndroi me bashkëlojtarët për të treguar mbështetje dhe duartrokiti edhe kundërshtarët, por situata ndryshoi sapo Saka iu afrua. Mbrojtësi spanjoll i pëshpëriti diçka në vesh, e preku në gjoks dhe nisi ta qortonte për mënyrën e ekzekutimit të penalltisë.
Why is Carvajal fighting Saka? Madrid is the worst club in all of football.
- Advertisement -
— MessiMania (@M10Update) April 16, 2025
Kur sulmuesi anglez tentoi të largohej drejt dhomave të zhveshjes, Carvajal e kapi përsëri për krahu, i pakënaqur me përgjigjen e tij. Situata shpejt doli jashtë kontrollit, duke përfshirë disa anëtarë të stafit të Arsenalit dhe rojet e sigurisë, të cilët ndërhynë për të ndarë lojtarët. Marca shkruan se në një moment, Carvajal e kapi Sakën edhe nga qafa.
Pavarësisht tensioneve, Arsenali siguroi me stil kualifikimin në gjysmëfinale të Ligës së Kampionëve, duke eliminuar Real Madridin me rezultat të përgjithshëm 5:1 – pas fitores 3:0 në Londër dhe 2:1 në ndeshjen e kthimit në Madrid.
