Një nga sulmuesit më të mirë në botë Karim Benzema, ka shprehur edhe njëherë pakënaqësinë e tij për shpalljen e lojtarit më të mirë në botë për vitin 2022, në përzgjedhjen e FIFA-s. Ylli i Real Madridit beson se çmimi duhej t`i takonte atij dhe jo Lionel Messit.
Benzema, i cili ka pasur një sezon fantastik në fanellën e “klubit mbretëror”, është fituesi i Topit të Artë të “France Football” për vitin 2022 dhe së bashku me Messin dhe Mbappen, ishte një nga kandidatët kryesorë për çmimin prestigjioz “The Best”, të cilin FIFA e ndau në bazë të votave të përzgjedhësve dhe kapitenëve të ekipeve kombëtare.
Benzema nuk mori pjesë në ceremoninë zyrtare në Paris. Një ditë më vonë, francezi shprehu sërish pakënaqësinë e tij duke postuar një sërë historish. Fillimisht ai ka postuar një foto të përbashkët me Vinicius Junior me mbishkrimin ‘The Beasts’, duke luajtur kështu me emrin e çmimit të dhënë nga FIFA. Me këtë ai aludoi për vendimin e FIFA-s vitin e kaluar për të mos e përfshirë sulmuesin brazilian në ekipin e sezonit.
Më pas ai ndau një postim duke nënvizuar të gjitha arritjet e tij gjatë vitit të kaluar.
- Advertisement -
Krahas një sërë çmimesh personale, ku përfshihet Topi i Artë, titulli i futbollistit më të mirë në Evropë, MVP i Champions League, titulli i lojtarit më të mirë të kampionatit spanjoll, Benzema ka kujtuar edhe sukseset me Kombëtaren dhe Realin. Në fakt, ai fitoi Ligën e Kombeve, Ligën e Kampionëve, La Ligën, Kupën e Botës për Klube… dhe shënoi 63 gola dhe 21 asistime.
Pas kësaj ai ka postuar një foto ku shfaqet duke pozuar me mesazhin: “Natën e mirë”.
