Tashmë dihet se Haaland ëndërron ta shohë veten një ditë duke luajtur me fanellën e Real Madridit. Atij i pëlqen Spanja (ka blerë një shtëpi në Marbella, përveç asaj që kishin prindërit e tij në Malaga) dhe gjithmonë simpatizonte Real Madridin perandorak të Cristianos në vitet e Champions League (2014, 2016, 2017 dhe 2018). Madje, ai u mahnit nga Champions-i i 14-të, fituar nga “Los Blancos” pas përmbysjeve epike kundër PSG, Chelsea dhe City (nënshkroi për skuadrën e Guardiolës atë verë).
Në “Bernabeu”, tashmë ka një mik shumë të mirë, Jude Bellingham. Të dy kaluan dy sezone te Borussia Dortmund, nga viti 2020 deri më 2022. Në ato dy sezone në qytetin e rajonit të Ruhr, ata “çimentuan” një miqësi që vazhdon edhe sot. Gjiganti norvegjez arriti të shënonte 70 gola në 71 ndeshjet e luajtura në ato dy sezone. E pabesueshme.
Bellingham, ende shumë i ri, shënoi 10 gola në 90 ndeshjet e tij me verdhezinjtë e Bundesligës, në dy sezone. Vitin e kaluar, pa Haaland, ai shpërtheu para se të mbërrinte në Madrid, duke shënuar 14 gola, rekordi i tij personal derisa zbarkoi në “Bernabéu” (ka shënuar 18 gola në 26 ndeshje me të bardhët).
Fakti është se, duke përfituar nga ndjenja e mirë që ekziston mes të dyve, Jude i ka komentuar vazhdimisht këto muaj Erling-ut që, nëse më në fund vendos të nënshkruajë për Real Madridin, do të kishte absolutisht të drejtë. Anglezi i tregon nordikut se sa e pabesueshme është të luash në “Bernabeu” e ri, me atë çati të mbyllur, që e bën brutale akustikën e festimeve të golave.
- Advertisement -
Ai gjithashtu flet me të për tifozët madrilenë dhe mënyrën se si i shtyjnë fort në ndeshjet e mëdha. Këtë gjë, Haaland e vuajti sezonin e kaluar, në gjysmëfinalet e Ligës së Kampionëve, duke mos qenë në gjendje të shënonte asnjë gol. Kjo edhe falë markimit mbresëlënës të Rüdiger.
Sigurisht, Bellingham i ka folur edhe për madhështinë e klubit, ambientet mbresëlënëse në Valdebebas, profesionalizmin e ekipeve të punës, bashkëjetesën madhështore të skuadrës me një staf stërvitor të drejtuar nga Ancelotti, seriozitetin në pagesa, cilësinë e jetës në kryeqytetin spanjoll, me një ofertë të pakrahasueshme gastronomike dhe argëtuese.
E gjitha kjo po i bie në veshët e Haaland, i cili e di se, siç raportohet tashmë nga “AS”, se ka një klauzolë për ekipet jashtë Premier League mes 100 dhe 200 milionë eurove. Shifra që nuk përbëjnë problem për Florentino Perez, nëse zhgënjehet sërish nga Mbappe dhe fokusohet përfundimisht te ylli norvegjez.
