Trajneri i Real Madridit, Carlo Ancelotti, ka folur për herë të parë pas eliminimit të skuadrës së tij në çerekfinalet e Ligës së Kampionëve, pas humbjes 2:1 ndaj Arsenalit në “Santiago Bernabeu”. Skuadra e Mikel Artetas kaloi në gjysmëfinale me rezultat të përgjithshëm 5:1, duke ruajtur avantazhin prej tri golash të fituar në ndeshjen e parë.
Ancelotti e pranoi disfatën dhe theksoi se skuadra bëri gjithçka për të bërë një kthesë, por nuk ia doli.
“Ekipi u përpoq, por nuk arritëm ta përmbysnim situatën. Arsenali kaloi me meritë. Futbolli ka dy anë: lumturinë që e kemi shijuar vitet e fundit dhe trishtimin që po e përjetojmë tani,” ka thënë trajneri italian.
Një nga pyetjet më të nxehta pas eliminimit ishte e ardhmja e tij në stolin e Real Madridit. Ancelotti, i cili është shpesh i lidhur me mundësinë e një largimi pas sezonit, dha një përgjigje të hapur:
- Advertisement -
“Ne jemi ende në garë për La Ligën, Kupën e Mbretit dhe Kupën e Botës për Klube. Nuk mund të flas tani për të ardhmen time dhe nëse do të drejtoj Realin në Kupën e Botës për Klube. Nëse klubi vendos të më zëvendësojë, nuk ka asnjë problem, dhe do ta falënderoj. Nuk e di dhe nuk dua ta di tani,” përfundoi Ancelotti.
Në këtë mënyrë, trajneri i Real Madridit nuk ka dhënë asnjë sinjal për një largim të mundshëm, duke lënë hapësirë për spekulime në lidhje me të ardhmen e tij.
