Shkruan: Koço Kokëdhima
Kryetari i partisë “Zgjidhja”, Koço Kokëdhima, duke komentuar ngjarjen e rëndë të së dielës në Kosovë, ku terroristët e ardhur nga Serbia vranë një efektiv dhe plagosën dy të tjerë, u shpreh se Afrim Bunjaku është dëshmori më i ri i Kosovës, por kjo ditë e zezë nuk do të kishte ardhur nëse komuniteti ndërkombëtar do të qëndronte përkah Kosovës martire dhe jo Serbisë agresore.
Sipas Kokëdhimës, u desh sërish gjaku i derdhur shqiptar që bota mbarë të shikonte fytyrën e vërtetë të regjimit të Beogradit, që, njëlloj si në kohën e Millosheviçit, është gati të kryejë sërish masakra ndaj shqiptarëve. Ai thotë se për të mos përsëritur skenarët tragjikë të viteve 1998-1999, Perëndimi duhet të jetë me Kosovën dhe popullin e saj martir dhe jo me qarqet fashiste serbe.
Reagimi i Kokëdhimës
- Advertisement -
Afrim Bunjaku është dëshmori më i ri i Kosovës. Efektivi i policisë së Kosovës u vra në një pritë nga forcat terroriste të ardhura nga Serbia, ndërsa dy të tjerë u plagosën.
Kjo ditë e zezë për Kosovën nuk do të kishte ardhur nëse komuniteti ndërkombëtar do të qëndronte përkah Kosovës martire dhe jo Serbisë agresore. Ata nuk reaguan kur më 29 maj turma serbësh të armatosur sulmuan dhe plagosën 25 ushtarë të KFOR-it. As kur më 14 qershor 3 policë të Kosovës u rrëmbyen nga një komando serbe brenda territorit kosovar e u çuan në Serbi për t’i liruar pas dy javësh, pas presionit të madh ndërkombëtar ndaj Beogradit. Fajësuan qeverinë e Kosovës, i vunë sanksione popullit dhe këmbëngulën që serbëve të Kosovës t’u jepet asociacioni, një skenar i rrezikshëm që e kthen veriun në një Bosnje në shpërthim.
Aleatët perëndimorë të kombit shqiptar tani po e kuptojnë drejtësinë e vendimeve të qeverisë së Kosovës për të kontrolluar çdo pëllëmbë të shtetit të pavarur, se Serbia vazhdon të jetë armike e betuar dhe Vuçiç një aleat i Rusisë dhe kundër paqes në rajon.
U desh sërish gjaku i derdhur shqiptar që bota mbarë të shikonte fytyrën e vërtetë të regjimit të Beogradit, që, njëlloj si në kohën e Millosheviçit, është gati të kryejë sërish masakra ndaj shqiptarëve. Ndaj, për të mos përsëritur skenarët tragjikë të viteve 1998-1999, Perëndimi duhet të jetë me Kosovën dhe popullin e saj martir dhe jo me qarqet fashiste serbe.
