Kryetarja e Dhomave të Specializuara të Gjykatës Speciale, Ekaterina Trendafilova, ka nisur sot një vizitë zyrtare treditore në Kosovë. Lajmin e ka konfirmuar Policia e Kosovës, e cila ka njoftuar se do të ndërmarrë masa të posaçme për garantimin e rendit dhe sigurisë publike gjatë qëndrimit të saj.
Sipas komunikatës zyrtare, Policia do të veprojë në bashkërendim me autoritetet kompetente ndërkombëtare, duke ndërmarrë hapa për të siguruar zhvillimin e qetë të vizitës dhe takimeve të paralajmëruara të kryetares Trendafilova.
Për të mundësuar lëvizjen e lirë sipas itinerarit të paraparë dhe për të garantuar mbarëvajtjen e aktiviteteve zyrtare, do të ketë ndërprerje të përkohshme të trafikut në disa segmente rrugore. Policia thekson se këto bllokada do të jenë të shkurtra dhe të kontrolluara, ndërkohë që qytetarët do të udhëzohen për përdorimin e rrugëve alternative.
“Policia e Kosovës kërkon mirëkuptim nga ana e qytetarëve dhe pjesëmarrësve në trafik, duke theksuar se të gjitha masat do të zbatohen për garantimin e rendit dhe sigurisë gjatë kësaj vizite zyrtare,” thuhet në njoftim.
