Zyrtari i lartë amerikan Price, kërkon që dialogu të mbyllet me njohje reciproke

Shtetet e Bashkuara të Amerikës vazhdimisht po bëjnë thirrje që të pranohet Plani Evropian mes Kosovës dhe Serbisë.

Zyrtari i lartë amerikan Ned Price, ka thënë se ky është vetëm një nga hapat drejt normalizimit përfundimtar që duhet të përfundojë me njohje reciproke.

Price në një intervistë për Pavlovic Today tha se marrëveshja drejt normalizimit, në fund duhet të ketë njohje reciproke.

“Ky është një proces i udhëhequr nga BE-ja. Shtetet e Bashkuara kanë mbështetur aleatët tanë në Bashkimin Evropian në çdo mënyrë që mundemi. Ne kemi qenë të pranishëm në këto bisedime. Gabe Escobar , Zëvendës Ndihmës Sekretari ynë, ka qenë i angazhuar në mënyrë aktive edhe me palët dhe do të vazhdojë të bëjë çfarë mundemi për të mbështetur këtë proces. Kjo, përsëri, ka ecur përpara në mënyra të rëndësishme, me disa punë të vështira përpara”, ka thënë ai.

Tutje Price ka theksuar qëndrimin kritik në lidhje me formimin e Asociacionit. Sipas tij, me Planin Evropian duhet t’iu jepet rrugë të gjitha marrëveshjeve të nënshkruava ndërmjet dy shteteve.

“Përmes dialogut, Serbia dhe Kosova besojmë se duhet të arrijnë një marrëveshje gjithëpërfshirëse për normalizimin e marrëdhënieve. Progresi më pas do të hapë derën për integrimin evropian të të dy vendeve”, deklaroi më tutje Price në emër të sekretarit Blinken.

Ai kërkoi që Kosova e Serbia urgjentisht të zgjidhin të gjitha temat që potencialisht mund të çojnë në tensione të reja.

“SHBA do të ndërmarrë çdo hap si partner i Kosovës, Serbisë dhe BE-së për të “mbështetur përshpejtimin në çdo mënyrë të mundshme të përmirësimit të marrëdhënieve ndërmjet Kosovës dhe Serbisë, por ne thjesht mundemi. mos vendosni një kornizë kohore për të”, përfundoi Ned Price.

Shtetet e Bashkuara të Amerikës vazhdimisht i kanë bërë thirrje Kosovës ta pranojë planin evropian.

Sipas BE-së, pas qëndrimit në Kosovë, më 13 dhe 14 mars, Lajçak do të vizitojë Beogradin.

Vizita e Lajçakut në Prishtinë dhe Beograd vjen pas takimit të 27 shkurtit, kur kryeministri i Kosovës, Albin Kurti, dhe presidenti i Serbisë, Aleksandar Vuçiq, e pranuan planin evropian për normalizimin e raporteve. Bartësit e dialogut po ashtu u shprehën të gatshëm të punojnë në planin për zbatimin e këtij propozimi.

Rundi i ri i dialogut është caktuar të mbahet më 18 mars në Ohër të Maqedonisë së Veriut, dhe sipas BE-së, qëllimi kryesor tani është që palët të arrijnë pajtim rreth një plani si dhe të modaliteteve për zbatimin e propozimit evropian.

Kryeministri i Kosovës, Albin Kurti, deklaroi më 8 mars, se po vazhdojnë përgatitjet për takimin në Ohër.

“Do të shohim se si do të mund t’ia bashkëngjisim propozimit të dakorduar evropian edhe një plan të mirëfilltë zbatimi që duhet të karakterizohet nga gjithpërfshirja dhe nga efikasiteti”, tha ai.

Pavarësisht se e pranuan planin, që Kosovës dhe Serbisë fillimisht u ishte dorëzuar vitin e kaluar, Kurti dhe Vuçiq nuk e nënshkruan dokumentin gjatë takimit të 27 shkurtit.

Kurti ka deklaruar se ishte i gatshëm ta nënshkruante propozimin evropian – Marrëveshjen drejt normalizimit mes Kosovës dhe Serbisë. Por, sipas tij, këtë gatishmëri nuk e pati pala serbe.