Zyra e Rregullatorit të Energjisë (ZRrE) ka njoftuar se do të zhvillojë takime bilaterale me palët e interesit, duke filluar nga sot deri më 10 prill. Takimet janë thirrur për të diskutuar mbi tarifat e reja të energjisë elektrike, dhe do të marrin pjesë përfaqësues nga të gjitha palët që kanë dorëzuar komente në procesin konsultativ.
Palët e interesit, përfshirë qytetarët, organizatat, bizneset dhe operatorët energjetikë, do të kenë mundësinë të ofrojnë informacione shtesë dhe të diskutojnë çështjet që lidhen me procesin tarifor. Pas përfundimit të takimeve, më 11 prill, do të bëhet përmbyllja e konsultimeve dhe do të jepen përgjigjet ndaj komenteve të pranuara.
Në këtë proces, deri më tani, 396 qytetarë, tetë organizata, katër biznese, katër operatorë energjetikë, një deputet, Ministria e Ekonomisë dhe presidenca e Kosovës kanë dërguar komente. Zyra e Presidencës ka kundërshtuar propozimin për rritjen e çmimit të energjisë me 15 përqind dhe ka kërkuar, në komentet e saj, heqjen e TVSH-së prej 8 përqind nga faturat e energjisë elektrike.