Qendra Kosovare për Studime të Sigurisë (QKSS) ka njoftuar se faqja e saj zyrtare në internet është përkohësisht jashtë funksionit, si masë parandaluese ndaj një sulmi të dyshuar kibernetik.
Sipas QKSS-së, sulmet dyshohet të jenë ndërmarrë nga grupe hakerësh të lidhura me rrjete ruse dhe serbe.
Në njoftimin zyrtar, QKSS thekson se pavarësisht tentativave për cenim të infrastrukturës digjitale, deri më tani faqja e tyre ka mbetur e paprekur. Megjithatë, për arsye sigurie, është vendosur pezullimi i përkohshëm i funksionimit të saj.
Aktualisht, ekipet e Teknologjisë Informative të Qendrës janë duke punuar për rikthimin e faqes online dhe garantimin e sigurisë së saj.
