Zyra e Rregullatorit të Energjisë (ZRRE) ka sqaruar përmes një njoftimi se ende nuk është marrë asnjë vendim lidhur me rritjen e tarifave të energjisë.
Në njoftim theksohet se, për të siguruar transparencë dhe mundësi për diskutime të hapura nga të gjitha palët e interesuara, ZRRE ka publikuar Raportin Konsultativ për të Hyrat Maksimale të Lejuara për konsultim publik.
“Në kuadër të përpjekjeve për të ofruar një proces të hapur dhe të drejtë, ZRRE-ja fton të gjithë aktorët e interesuar – përfshirë konsumatorët, organizatat e shoqërisë civile dhe bizneset – të paraqesin komentet dhe sugjerimet e tyre për raportin deri më 28 mars. Ky është një mundësi për të siguruar që çdo vendim i ardhshëm të bazohet në një dialog të gjerë dhe të ndihmojë në krijimin e një sistemi të drejtë për të gjithë”, thuhet në njoftim.
Sipas ZRRE-së, është e angazhuar për të ofruar informacion të plotë dhe të qartë dhe për të ruajtur një komunikim të hapur dhe të vazhdueshëm me publikun për çdo zhvillim që mund të ndikojë në tarifat e energjisë.
- Advertisement -
Për të paraqitur komentet, qytetarët mund të vizitojnë faqen zyrtare të ZRRE-së.
Nga ana tjetër, për 5 prill është paralajmëruar një protestë qytetare kundër mundësisë së rritjes së çmimit të energjisë. Luan Hasanaj, nga iniciativa “Asnjë cent më shumë”, ka theksuar për RTK-në se kjo protestë është mënyra e vetme që qytetarët mund të shprehin kundërshtimin e tyre ndaj këtij vendimi.
“Rritja e çmimit të energjisë do të shkaktonte një seri shtrenjtimesh. Qytetarët kërkojnë vetëm mundësinë për të jetuar në kushte normale. Protesta është mënyra e vetme për të kërkuar llogari, pasi qytetarëve nuk u interesojnë aspektet teknike apo investimet në termocentrale – ata duan vetëm të mund të jetojnë,” ka theksuar Hasanaj.
