Në Gjykatën Themelore në Prishtinë sot pritet të mbahet seanca gjyqësore për rastin e sulmit të armatosur në Banjskë, ngjarje që tronditi vendin më 24 shtator 2023 dhe që u cilësua si akt terrorist nga autoritetet e Kosovës. Të akuzuarit që ndodhen në paraburgim pritet të deklarohen lidhur me fajësinë.
Seanca e sotme vjen pas ndërprerjes së shqyrtimit fillestar më 25 shtator të vitit të kaluar, kur nisi zyrtarisht procesi gjyqësor ndaj të pandehurve për këtë rast. Në atë kohë, tre nga 45 personat e dyshuar – Vladimir Toliq, Blagoje Spasojeviq dhe Dushan Maksimoviq – u paraqitën para trupit gjykues.
Gjykimi ishte ndërprerë menjëherë pas fillimit, pas kërkesës së mbrojtjes, me arsyetimin se nuk kishin pranuar në formë fizike të gjitha shkresat e lëndës, duke e pamundësuar përgatitjen adekuate për mbrojtje.
Aktakuza për rastin u ngrit më 11 shtator 2023, ndërsa ngjarja mbetet një nga më të rëndat në vitet e fundit në Kosovë. Gjatë sulmit në Banjskë humbi jetën polici i Njësisë Speciale të Kosovës, Afrim Bunjaku, i cili është shpallur hero nga institucionet e vendit.
- Advertisement -
Rasti “Banjska” ka ngjallur reagime të gjera kombëtare dhe ndërkombëtare, duke theksuar rëndësinë e zbardhjes së plotë të sulmit dhe sjelljes së autorëve para drejtësisë.
