Mbetjet mortore të dhjetë viktimave të luftës, të cilët ishin pjesë e Listës së Personave të Zhdukur, do të rivarrosen sot, pas identifikimit të tyre nga mbetjet e zhvarrosura në varrezat masive në Bishtazhin. Komisioni Qeveritar për Personat e Zhdukur ka njoftuar se data 4 prill ishte kërkesë e familjarëve, për të shënuar përvjetorin e Masakrës së Kralanit.
Ceremonitë do të fillojnë nga ora 12:00 deri në 13:00, me homazhe në Sallën e Sporteve “Adem Jashari” në Klinë. Më pas, në orën 13:00, do të mbahet Akademia Përkujtimore në të njëjtën sallë.
Në orën 14:30 do të zhvillohet ceremonia e rivarrimit të viktimave në Kompleksin Memorial “Kodra e Kuqe” në Grabanicë, ku do të rivarrosen Adem Gashi, Sahit Gashi, Bekim Hasani, Sheremet Ismajli, Osman Fejza, Shkelzen Hajdaraj dhe Bekim Gashi.
Ndërkohë, në ora 16:30, në varrezat e Jashanicës në Klinë, do të zhvillohet ceremonia e rivarrimit të Mentor Myrtajt.
- Advertisement -
Në Malishevë, do të mbahet një ceremoni tjetër rivarrimi, ku do të rivarroset viktima e luftës Vehbi Halilaj. Homazhet do të zhvillohen në Shkollën “Petro Nini Luarasi” në fshatin Llapqevë, ndërsa ceremonia e rivarrimit do të mbahet në orën 14:00.
Viktima tjetër, Mentor Kryeziu, do të rivarroset në varrezat e fshatit Bubavec, ku homazhet do të bëhen në Odën e Fshatit dhe ceremonia do të fillojë në orën 16:30.
Komisioni Qeveritar për Personat e Zhdukur gjithashtu njoftoi se rivarrimi i mbetjeve mortore të viktimës Sabedin Kryeziu është organizuar për 21 mars 2025 në varrezat e fshatit Mleqan të Malishevës.
Komisioni ka shprehur ngushëllime për familjarët e viktimave dhe ka theksuar angazhimin e tij të vazhdueshëm për zbardhjen e fatit të të gjithë personave të zhdukur me forcë gjatë luftës.