Presidenti i Sllovakisë, Peter Pellegrini, gjatë vizitës së tij në Tiranë, ka bërë të qartë se vendi i tij do të qëndrojë i palëkundur në qëndrimin për të mos njohur pavarësinë e Kosovës. Ai theksoi se ky qëndrim nuk ka të bëjë me miqësinë e madhe që Sllovakia ka me Shqipërinë dhe popullin shqiptar, por është një politikë e bazuar në rregullat e diplomacisë sllovake.
“Ne i kemi diskutuar këto çështje me Presidentin Begaj dhe kam shpjeguar pozicionin e Sllovakisë në lidhje me Kosovën, që është i njëjtë me atë të shumë shteteve që ende nuk e kanë njohur shtetin e Kosovës. Ky vendim është i bazuar në rregullat e diplomacisë tonë dhe nuk ka lidhje me marrëdhëniet tona të shkëlqyera me popullin shqiptar. Kombi shqiptar është një mik i Sllovakisë, dhe qëndrimi ynë nuk është kundër shqiptarëve, por për të respektuar diplomacinë tonë”, deklaroi Pellegrini.
Gjithashtu, ai theksoi rëndësinë e dialogut të vazhdueshëm mes Kosovës dhe Serbisë për çështjet e sigurisë në rajon, duke përmendur edhe përpjekjet e qeverisë shqiptare në këtë drejtim, që përfshijnë dërgimin e një përfaqësuesi të posaçëm për dialogun. Pellegrini theksoi se është e rëndësishme të vendosen ura lidhëse dhe të ketë një vazhdim të procesit të dialogut për të arritur zgjidhje të qëndrueshme.
