Pavarësisht përpjekjeve të intensifikuara diplomatike të Serbisë, përfshirë edhe angazhimin e bashkëshortes së presidentit serb, Kenia ka njohur sot pavarësinë e Kosovës.
Presidentja e Kosovës, Vjosa Osmani, ka njoftuar sot se Kenia ka pranuar të njohë Kosovën si shtet të pavarur dhe sovran, me një akt të nënshkruar nga presidenti William Ruto.
Kështu, Kenia u bë shteti i 105-të që e ka pranuar pavarësinë e Kosovës, duke e njohur atë si shtet të pavarur. Megjithatë, Kosova vazhdon të mbetet jashtë Organizatës së Kombeve të Bashkuara për shkak të kundërshtimeve nga Rusia dhe Kina, dy anëtarë të përhershëm të Këshillit të Sigurimit të OKB-së.
Njohja nga Kenia vjen pas një ofensive diplomatike të Serbisë që ka nisur disa muaj më parë për të bllokuar njohjet e Kosovës. Në tetor të vitit 2024, Tamara Vuçiq, bashkëshortja e presidentit serb Aleksandar Vuçiq, udhëtoi për në Nairobi si pjesë e përpjekjeve diplomatike të Serbisë.
- Advertisement -
Vizita e saj, e paplanifikuar më parë, shkaktoi spekulime se qëllimi kryesor i udhëtimit ishte lobimi kundër njohjes së Kosovës. Pas kësaj, Vuçiq mori pjesë në bisedime me kryeministrin kenian Musalia Mudavadi dhe ministrin e Punëve të Jashtme, duke theksuar nevojën për forcimin e lidhjeve dypalëshe dhe bashkëpunimin ekonomik mes Serbisë dhe Kenias.
Pavarësisht këtyre përpjekjeve, Kenia ka vendosur të njohë pavarësinë e Kosovës dhe është shteti i fundit që ka mbështetur këtë proces.
