Gjykata Themelore në Prishtinë, konkretisht Departamenti Special, ende nuk ka marrë një vendim për të zhvilluar gjykimin në mungesë për 42 të akuzuarit për sulmin terrorist në Banjskë të Zveçanit, ku humbi jetën rreshteri Afrim Bunjaku. Këtë e ka konfirmuar për RTK-në zëdhënësja e Gjykatës Themelore në Prishtinë. Ndërkohë, seanca për shqyrtimin gjyqësor të çështjes penale ndaj tre të akuzuarve që ndodhen në paraburgim, do të zhvillohet më 17 prill.
Vladimir Toliq, Blagoje Spasojeviq dhe Dushan Maksimoviq, të akuzuar për sulmin terrorist në Banjskë të Zveçanit dhe që ndodhen në paraburgim, pritet të dalin para drejtësisë më 17 prill.
Megjithatë, 42 të akuzuarit e tjerë për këtë sulm, përfshirë Milan Radoiçiq, nuk do të jenë pjesë e kësaj seance. Në shqyrtimin fillestar, prokurori i rastit, Naim Abazi, kishte kërkuar që të zhvillohej gjykimi në mungesë. Por, Gjykata Supreme e ka lënë në diskrecion të gjykatës së shkallës së parë vendimin për zhvillimin e gjykimit në mungesë. Aktualisht, kjo gjykatë ende nuk ka marrë një vendim, siç ka njoftuar zëdhënësja e Gjykatës Themelore në Prishtinë, Mirlinda Shala.
“Sa i përket kërkesës tuaj për informata, ju njoftojmë se seanca e shqyrtimit gjyqësor për të akuzuarit V.T., B.S. dhe D.M. është caktuar për 17 prill 2025, në orën 09:30. Ndërsa për të akuzuarit e tjerë, për të cilët është veçuar lënda dhe për të cilët është propozuar gjykim në mungesë, ende nuk është marrë një vendim nga Departamenti Special i Gjykatës Themelore në Prishtinë,” tha për RTK-në zëdhënësja Mirlinda Shala.
- Advertisement -
Avokati i Familjes Bunjaku, Arianit Koci, ka theksuar se është e mundur që gjykimi të zhvillohet në mungesë, por ai ka kërkuar që ky rast të trajtohet me seriozitet, duke e theksuar se nuk bëhet fjalë vetëm për një çështje familjare të familjes Bunjaku, por për një çështje që ka të bëjë me dinjitetin institucional dhe kujtesën shtetërore.
“Vetëm kërkoj që gjykata t’iu ofrojë të akuzuarve të drejtat procedurale që u takojnë me ligj, për të siguruar që aktgjykimi të jetë i drejtë dhe të mos mund të kontestohet më tej në Gjykatën e Apelit,” tha ai.
Autoritetet e Kosovës kanë kërkuar ekstradimin e Milan Radoiçiq dhe të akuzuarve të tjerë për sulmin terrorist në Banjskë të Zveçanit, por ende nuk ka ndodhur një gjë e tillë. Ata janë në kërkim ndërkombëtar, dhe ka pasur shtysë edhe nga faktorë ndërkombëtarë për Serbinë që t’i dorëzojë ata drejtësisë së Kosovës.
