Po vazhdon seanca konstituive e Kuvendit të Kosovës, e cila ishte ndërprerë dy ditë më parë pas moskalimit të raportit të Komisionit për verifikimin e mandateve të deputetëve.
Raporti mori vetëm 52 vota nga 61 sa kërkohen për miratim, duke pamundësuar ecjen përpara të procesit konstituiv të legjislaturës së re.
Në përpjekje për të gjetur një zgjidhje, kryesuesi i seancës, Avni Dehari, ka ftuar partitë politike në konsultime. Qëllimi i takimit ishte diskutimi i mënyrës së vazhdimit të seancës dhe kapërcimit të ngërçit aktual.
Megjithatë, ftesës së Deharit nuk iu përgjigjën partitë opozitare që ishin pjesë e përbërjes së kaluar parlamentare. Mungesa e tyre lë të paqartë fatin e mëtejmë të seancës dhe të procesit të konstituimit të Kuvendit.
- Advertisement -
Kujtojmë se të martën, seanca u ndërpre pikërisht për shkak të dështimit për të kaluar raportin e verifikimit të mandateve të 120 deputetëve të zgjedhur në zgjedhjet e fundit parlamentare.
