Tuneli i Llogorasë do të hapet për qarkullim nga dita e shtunë, 24 maj, duke ofruar një lehtësim të ndjeshëm në lëvizjen drejt bregdetit jugor gjatë sezonit turistik. Lajmin e bëri të ditur zëvendëskryeministrja dhe ministrja e Infrastrukturës, Belinda Balluku, e cila konfirmoi gjithashtu se kalimi përmes tunelit do të jetë pa pagesë deri më 15 shtator.
“Duke nisur nga nesër, hapet për qarkullim Tuneli i Llogorasë – një vepër e rëndësishme që shkurton distancën drejt bregdetit të jugut dhe i shërben sezonit turistik. Hyrja do të jetë pa tarifë deri më 15 shtator. Kalimi ndalohet vetëm për mjetet e tonazhit të rëndë”, u shpreh Balluku.
Tuneli, me një gjatësi prej 5.9 kilometrash, pritet të reduktojë ndjeshëm kohën e udhëtimit nga Dukati në Palasë – një segment që më parë kërkonte rreth 30 minuta për t’u përshkuar, tani mund të kalohet për vetëm 7 minuta.
Vepra inxhinierike përbëhet nga dy tunele – ai kryesor dhe tuneli i emergjencës – të lidhur përmes 11 korridoreve ndërlidhëse, përgjatë gjithë gjatësisë së saj. Shpejtësia maksimale e lejuar në tunel është 80 kilometra në orë.
- Advertisement -
Rihapja e tunelit përkon me nisjen e fluksit të pushuesve drejt jugut, ndërsa autoritetet u bëjnë apel drejtuesve të automjeteve që të respektojnë kufizimet dhe rregullat e qarkullimit për sigurinë e të gjithëve.
