Kryetari i Prishtinës, Përparim Rama, në një prononcim për Ekonominë Online tha se në takimin koordinues të mbajtur të hënën ndërmjet kryeministrit Albin Kurti dhe kryetarëve të komunave, në njëfarë mënyre janë dakorduar që të hyrat vetanake t’u kthehen komunave.
Ai tha se të hyrat vetanake me ligj u takojnë komunave që t’i përdorin në të mirë të qytetarëve dhe se ato nuk mund të tjetërsohen.
Madje ai thotë se do ta luftojnë çdo tentim që mjetet t’u merren, duke shtuar se kjo formë është joligjore.
“Mendoj që të hyrat vetanake me ligj faktikisht u takojnë komunave, pra të hyrat vetanake të kryeqytetit janë të kryeqytetit, janë të qytetarëve të kryeqytetit dhe nuk munden që të tjetërsohen ato. Çdo tentim normal që është joligjor edhe ne do ta luftojmë çdo tentim. Patëm një takim të mirëfilltë edhe me kryeministrin, edhe me ministrin e Financave, ku edhe në njëfarë mënyre u dakorduan që të hyrat vetanake t’u kthehen, të lejohen për përdorim për projekte të cilat janë duke pritur për të mirën e kryeqytetit”.
- Advertisement -
“Shpresoj që kjo çështje do të marrë fund për të mirën e qytetarëve dhe të gjitha komunave, po shpresoj për brenda javës do t’i kemi ato të hyra vetanake që t’i përdorim për projekte të shumta, të cilat i pret kryeqyteti edhe qytetarët këtu. Jam optimist që këtë çështje e kemi zgjedhur”, tha ai.
Ai shtoi se për këtë çështje Asociacioni i Komunave të Kosovës i është drejtuar Qeverisë me një letër, duke pohuar që pritet që të lehtësohet procesi i bartjes së mjeteve të komunave, raporton EO-ja.
“Tash e kanë kërkuar një letër, të cilën unë personalisht, ne si kryeqytet i kemi dërguar para dy javësh, tash po e kërkojnë një letër tjetër prej Asociacionit të Komunave të Kosovës, edhe atë e kemi dërguar, i kemi kërkuar Asociacionit që ta dërgojë. Besoj që do të çlirohet procesi i bartjes së mjeteve te komunat përkatëse”, tha ai.
Me Projektligjin e Buxhetit për vitin 2023 Qeveria ka paraparë që nëse të hyrat vetanake të një komune nuk shpenzohen gjatë një viti, ato do t’i merren dhe t’u dhurohen komunave të tjera ose të përdoren në nivelin qendror.
