Kryeministri i Shqipërisë, Edi Rama, ka zhvilluar një takim me punonjës dhe përfaqësues të bizneseve, ku u diskutua për politikat e punësimit dhe aftësimit të forcës së punës në vend.
Gjatë fjalës së tij, Rama theksoi se Shqipëria po përjeton një kthesë të rëndësishme dhe se vendi do të eksportojë makina ushtarake të gjeneratës së fundit, të prodhuara “Made in Albania”.
“Dua të theksoj disa aspekte kyçe të situatës së punës dhe perspektivën time optimiste. Shqipëria po kalon në një fazë të re zhvillimi, që është rezultat i përpjekjeve të shumta gjatë këtyre viteve. Sot, kthesa është në dinamikën e saj,” tha Rama.
Ai shtoi se produktet e këtij sektori do të jenë “Made in Albania” dhe do të eksportohen në tregje të tjera. “Do ta bëj Shqipërinë falë Arjelës dhe kompanisë së saj, që do të prodhojnë makina ushtarake të gjeneratës së fundit. Kjo është diçka që nuk mund të kishte ndodhur disa vite më parë. Kjo do të na mundësojë të prodhojmë për nevojat tona, ndërsa strategjia jonë është të blejmë jashtë vetëm ato produkte që nuk mund t’i prodhojmë këtu,” shtoi Rama.
- Advertisement -
Në përmbyllje, Kryeministri theksoi se ky sektor do të krijojë mundësi të reja punësimi dhe do të ketë paga domethënëse për punonjësit. “Paga mesatare në këtë kompani është 1000 euro,” përfundoi ai.
