Ushtruesi i Detyrës së Kryeshefit të “Trafikut Urban”, Qendrim Vitija, dhe Kryeshefi Ekzekutiv i ndërmarrjes KU’ZINA, Asdren Osaj, kanë nënshkruar sot një marrëveshje bashkëpunimi që ka në fokus përfshirjen më të gjerë të punonjësve në përdorimin e transportit publik.
Në kuadër të kësaj marrëveshjeje, punonjësit e ndërmarrjes KU’ZINA do të përfitojnë bileta vjetore për shfrytëzimin e shërbimeve të “Trafikut Urban”, me çmim të reduktuar.
Kjo iniciativë bazohet në vendimin e Kryetarit të Komunës së Prishtinës, Përparim Rama, për ofrimin e biletave vjetore me çmim preferencial prej 120 euro për institucionet, korporatat dhe ndërmarrjet publike me mbi 50 të punësuar.
Gjatë ceremonisë së nënshkrimit, z. Vitija theksoi se qëllimi kryesor i kësaj nisme është promovimi i përdorimit të transportit publik si alternativë më e qëndrueshme dhe miqësore me mjedisin. Ai shtoi se kjo ndihmon jo vetëm në reduktimin e ndotjes së ajrit dhe zvogëlimin e ngarkesës në komunikacion, por gjithashtu kontribuon në ndërtimin e një kryeqyteti më të përballueshëm dhe të qëndrueshëm.
- Advertisement -
Nga ana tjetër, drejtues të ndërmarrjes KU’ZINA vlerësuan këtë bashkëpunim si një hap pozitiv drejt përmirësimit të mirëqenies së punonjësve dhe pjesëmarrjes aktive në nismat për një mjedis më të pastër.
Përmes kësaj marrëveshjeje, autoritetet lokale ftojnë edhe institucionet dhe bizneset tjera të bashkohen në këtë nismë, duke kontribuar së bashku në zhvillimin e një infrastrukture urbane më të gjelbër dhe më efikase.
