Një numër i madh qytetarësh janë mbledhur sot në sheshin “Zahir Pajaziti” në Prishtinë, për të protestuar kundër propozimit të Zyrës së Rregullatorit për Energji (ZRrE) për rritjen e çmimit të energjisë elektrike për 15 për qind.
Protesta, e organizuar nga nisma “Asnjë cent më shumë”, ka pasur për qëllim kundërshtimin e këtij propozimi, i cili pritet të shqyrtohet gjatë mbledhjes së Bordit të ZRrE-së, e planifikuar për ditën e sotme.
Mbledhja e Bordit u hap pjesërisht për media, ndërsa më pas vijoi me dyer të mbyllura. Nga ZRrE njoftuan se do të publikojnë më vonë një vendim zyrtar lidhur me tarifat e reja të energjisë elektrike.
Pas tubimit në shesh, protestuesit kanë paralajmëruar vazhdimin e marshit drejt objektit të Zyrës së Rregullatorit për Energji dhe Ministrisë së Ekonomisë, për të shprehur pakënaqësinë e tyre me propozimin për shtrenjtimin e rrymës.
