Presidenti i Këshillit Evropian, António Costa, pritet të mbërrijë sot në Republikën e Kosovës, në kuadër të një vizite zyrtare në rajon, vetëm një ditë pas qëndrimit të tij në Beograd.
Vizita në Prishtinë vjen në një moment të ndjeshëm për dialogun Kosovë–Serbi, i cili vazhdon të jetë ndër temat kryesore në agjendën e Bashkimit Evropian për Ballkanin Perëndimor.
Costa do të zbarkojë në Aeroportin Ndërkombëtar të Prishtinës gjatë orëve të pasdites, për të nisur më pas takimet me udhëheqësit institucionalë të vendit. Në orën 16:30, ai do të pritet nga presidentja Vjosa Osmani në Presidencë, ku pas takimit është planifikuar një konferencë e përbashkët për media.
Më vonë, në orën 18:40, Presidenti i Këshillit Evropian do të takohet edhe me kryeministrin në detyrë, Albin Kurti, në ambientet e Zyrës së Kryeministrit.
- Advertisement -
Vizita e Costës në Kosovë vjen pas deklaratave të bëra në Beograd, ku ai nënvizoi se dialogu me Kosovën mbetet një nga kushtet themelore për përparimin e Serbisë drejt anëtarësimit në Bashkimin Evropian.
