Presidenca e Republikës së Kosovës shpreh kundërshtimin ndaj propozimit për rritjen e çmimit të energjisë elektrike, duke e konsideruar këtë veprim si në kundërshtim me kornizën ligjore që e detyron ZRRE-në të sigurojë mbrojtjen e konsumatorëve. Sipas Presidencës, ky propozim injoron situatën e rënduar ekonomike dhe ndikimin e tij në mirëqenien e qytetarëve.
Në një deklaratë të dërguar ZRRE-së, Presidenca thekson se, si dhe gjatë shqyrtimit të vitit 2023, ka analizuar raportet konsultative për përshtatjen e të hyrave maksimale të lejuara për operatorët energjetikë dhe ka dorëzuar komentet përkatëse. Ajo shton se është duke e ndjekur me shqetësim mundësinë e rritjes së çmimit të energjisë, pasi sipas raporteve të ZRRE-së, pritet një rritje prej 15% të tarifave për konsumatorët, që do të hyjë në fuqi në muajin prill, e cila është bazuar në propozimet nga kompanitë energjetike dhe vendimet për periudhën rregullative 2023-2027.
Presidenca gjithashtu thekson se çmimet e ushqimeve dhe inflacioni kanë pasur një ndikim të ndjeshëm në jetesën e qytetarëve, duke bërë që shpenzimet për energji të bëhen një pjesë e madhe e të ardhurave, sidomos për ata që kanë paga më të ulëta. Ajo kërkon që para miratimit të çdo rritjeje të çmimit të energjisë, ZRRE-ja të angazhohet në një monitorim të kujdesshëm të menaxhimit të energjisë nga KEK-u, duke rritur efikasitetin në prodhim dhe shpërndarje dhe duke ulur nevojën për importin e energjisë.
Në përfundim, Presidenca thekson se rritja e çmimit të energjisë nuk duhet të jetë opsioni i parë dhe i vetëm për të adresuar sfidat financiare, por duhet të kërkohen zgjidhje më të balancuara dhe të qëndrueshme për të mbrojtur interesat e qytetarëve dhe të ekonomisë.
