Në një ngjarje të rëndësishme për Komunën e Leposaviqit, sot u hap zyra e katërt e Postës së Kosovës në këtë komunë, pas një periudhe ndërprerjeje të shërbimeve postare. Zyra e re është vendosur në një objekt të rikthyer nën menaxhim të Postës së Kosovës dhe do të shërbejë për ofrimin e shërbimeve të zakonshme postare, si dhe pranimin e mjeteve financiare për qytetarët e Leposaviqit.
Përurimi i kësaj zyre ishte i pranishëm nga kryeministri në detyrë, Albin Kurti, ministrja në detyrë e Ekonomisë, Artane Rizvanolli, kryetari i Komunës së Leposaviqit, Lulzim Hetemi, dhe drejtuesit e Postës së Kosovës, përfshirë kryeshefen Nora Rraci dhe kryesuesin e Bordit, Gëzim Paci.
Kryeministri Kurti theksoi rëndësinë e ligjshmërisë dhe cilësisë në shërbimin postar, duke nënvizuar se operatorët e pa licencuar, të cilët kishin funksionuar më parë, janë mbyllur dhe tashmë qytetarët kanë akses vetëm në Postën e Kosovës. Ai gjithashtu vuri në dukje se, krahas shërbimeve të zakonshme postare, tani do të mund të pranohen dhe mjete financiare në euro, duke përmirësuar mundësitë për qytetarët e Leposaviqit.
“Ky projekt është një lajm i mirë për qytetarët e Leposaviqit dhe për shërbimin postar publik të Kosovës. Posta e Kosovës, që dikur ka operuar me humbje, tani operon me fitim dhe ka zgjeruar shërbimet në të gjithë territorin e Kosovës, përfshirë zonat më të largëta”, tha Kurti, duke shtuar se kjo është një dëshmi e angazhimit për shërbime më të mira për qytetarët.
- Advertisement -
Nga ana e tij, kryetari Hetemi falënderoi Qeverinë dhe Postën e Kosovës për hapjen e zyrës së re, duke kërkuar gjithashtu që të hapen edhe pika të tjera postare në komunën që ai drejton.
Kryeshefi i Postës së Kosovës, Nora Rraci, foli për planin e zgjerimit të rrjetit të zyrave postare, duke theksuar rritjen e numrit të pikave të shërbimit gjatë vitit të kaluar, që ka pasur një rritje prej 11% në të gjithë Kosovën. “Për dy vitet e fundit, kemi kaluar nga dy zyra postare në katër komunat veriore të Kosovës, dhe tani kemi arritur pikën e 13-të, që është një arritje e madhe,” tha Rraci.
Ministrja Rizvanolli e shprehu mbështetje të plotë për këtë iniciativë dhe nënvizoi angazhimin e Qeverisë për të mbështetur zgjerimin e Postës së Kosovës dhe përmirësimin e shërbimeve që ajo ofron.
Në përfundim, njoftimi i Kryeministrisë thekson se Posta e Kosovës, me mbështetje nga Qeveria, ka arritur të rrisë numrin e zyrave postare në 157 në të gjithë Kosovën, përfshirë 13 zyra në katër komunat veriore, duke investuar në infrastrukturë moderne, mjete transporti dhe shërbime të reja postare dhe financiare. Po ashtu, Posta ofron transfere ndërkombëtare të parave, shpërndarjen e dokumenteve shtetërore dhe mbështetje për zhvillimin e e-commerce.
