Prokuroria Themelore në Gjakovë ka ngritur aktakuzë ndaj pesë personave për keqpërdorim të pozitës apo autoritetit zyrtar.
Në komunikatën e dërguar për media bëhet me dije se të pandehurit duke qenë punëtorë të Kompanisë Rajonale te Ujësjellësit K.R.U “Gjakova”, dega në Rahovec, kanë shfrytëzuar mjetet si kamionin, eskavatorin, derivatin dhe materialin e nevojshëm për kyqjen e ujësjellësit, për përfitime të tyre vetanake.
“Të pandehurit gjegjësisht, H.Ç., i koordinuar me të pandehurin S.M., të pandehurin Z.V., dhe të pandehurit A.H., dhe M.U., kanë marrë për shërbimet e kryera tek qytetarët si, L.O., shumën prej 1.500 euro, G.D., shumën prej 350 euro, H.D., shumën prej 750 euro, A.A., shumën prej 1.000 euro dhe P.M., shumën prej 2.000 euro, të holla këto te cilat janë ndarë në mes të pandehurit H.Ç., dhe S.M., ndërsa në pagesa më të vogla u janë dhënë tre të pandehurve të tjerë, me çka në këtë mënyrë me veprimet e tyre të kundërligjshme të njëjtit i shkaktojnë dëm material të dëmtuarës K.R.U ‘Gjakova’ SH.A”, thekson aktakuza e Prokurorisë.
