Është përuruar nënstacioni i Policisë së Kosovës në Leshak të Leposaviqit. Të pranishëm në ceremoninë e përurimit ishin kryeministri Albin Kurti, ministri i Punëve të Brendshme, Xhelal Sveçla, drejtori i Policisë së Kosovës, Gazmend Hoxha dhe kryetari i Leposaviqit, Lulzim Hetemi.
Kryeministri Kurti këtë nënstacion e ka quajtur si burim të sigurisë dhe adresë të raportimit për çdo qytetar.
“Me 10 shtator 2024, para më pak se 5 muajsh, kemi vendosur gurthemelin e këtij nënstacioni policor këtu në Leshak të Leposaviqit. Sot ai është i gatshëm, dhe prej tash do të jetë burim i sigurisë dhe adresë e raportimit për çdo qytetar pa dallim që jeton në këtë zonë.
Pjesë e ndërtesës është edhe Agjencia për Regjistrim Civil, nga ku mund të marrin shërbimet qytetarët e komunës së Leposaviqit por edhe komunat e fshatrat përreth”, ka shkruar Kurti.
