Kryesuesi i seancës konstituive të Kuvendit të Kosovës, Avni Dehari, ka ftuar në takim të gjitha subjektet parlamentare, në përpjekje për të tejkaluar ngërçin institucional dhe për të mundësuar konstituimin e plotë të legjislaturës së nëntë.
Takimi pritet të mbahet sot në orën 09:30, pak para nisjes së seancës së re të thirrur për orën 10:00, njofton KosovaPress.
Kjo është hera e pestë që tentohen hapat përfundimtarë të konstituimit të Kuvendit, përfshirë zgjedhjen e kryetarit të tij – një proces që deri më tani ka dështuar për shkak të mungesës së konsensusit politik.
Lëvizja Vetëvendosje ka ripërsëritur qëndrimin se pa një marrëveshje politike, nuk duhet të ketë votim të njëanshëm për postin e kryetarit të Kuvendit. Deputeti i zgjedhur dhe nënkryetari i LVV-së, Glauk Konjufca, ka bërë të ditur se partia e tij vazhdon ta propozojë Albulena Haxhiun për këtë pozitë, pavarësisht se ajo nuk siguroi votat e nevojshme në seancën e kaluar.
- Advertisement -
Pikërisht për këtë arsye, seanca e së hënës u ndërpre nga kryesuesi Dehari, duke caktuar të mërkurën si ditë të re për vazhdimin e saj.
Kujtojmë se LVV-ja kishte dështuar më 19 prill të zgjedhë Haxhiun si kryetare të Kuvendit, duke shtuar edhe më tej pasigurinë politike në vend.
